தன்னிலை உணர்தல்

• பிச்சையெடுக்கிறது...மரம் சுமக்கிறது

வித்தை காட்டுகிறது

மண்டியிடுகிறது...ஆசீர்வதிக்கிறது

பழக்க பலதும் செய்கிறது

• சிறு சங்கிலியில் பிணைக்கப்படுகிறது

தார்க்குச்சியால் குத்தப்படுகிறது

அளவுச்சாப்பாடு உருட்டித்தின்கிறது

• தன்னிலை உணர்ந்து ஓர்நாள்

விட்டு விடுதலை ஆகிறது

அடிமைப்படுத்தியவன் சொல்கிறான்,

"அதற்குப் மனநிலை பிறண்டு விட்டது"

-ஜெ.நம்பிராஜன்

'மெக்காலே' மொழி

பூச்சாண்டி என்றால் என்னவென்றே

தெரிவதில்லை...'மெக்காலே' குழந்தைகளுக்கு

காட்சில்லாவையும் டைனோசரையும்

துணைக்கு அழைக்க வேண்டியிருக்கிறது

சோறு ஊட்ட

-ஜெ.நம்பிராஜன்

பிள்ளைத்தமிழ்

• படிக்கும் புத்தகத்தை
  பறித்துக்கொண்டு ஓடுகிறாய்
  புத்தகத்தை மறந்து விட்டு உன்னைப்
  படிக்கிறேன்...நான்

• மாறாத மழலைப்பாடல்களை
  மறந்து மறந்து பாடுகிறாய்
  மறக்காமல் மீண்டு வருகிறது
  எனது பால்யம்
  -ஜெ.நம்பிராஜன்