ஊடலுக்குப் பின்...

அழுது கொண்டிருந்தாய் நீ

அமர்ந்திருந்தேன் நான்

கொஞ்சகொஞ்சமாய்

கண்ணீரோடு 'நீ' வழிந்தோட

கண்ணீரில் 'நான்' கரைந்தோட

என்னைத் தொலைத்த நான்

உன்னை மறந்த நீ என

நாமானோம் நாம்.

-ஜெ.நம்பிராஜன்

அறியாத வயது

பள்ளி செல்லும் வழியில்

பழுதடைந்து நின்றது பேருந்து

வயல்வெளிச் சாலையில்

இறங்கி நின்ற மழலைகள்

பள்ளியை மறந்து பரவசமாயினர்

குயில்களின் கூவலோடு சேர்ந்தது

குழந்தைகள் குரல்

குழந்தைப் பருவம் தொலைத்த

நடுத்தர வயது ஆசிரியை

எரிச்சலோடு சொன்னாள்

"டோண்ட் டாக்".

-ஜெ.நம்பிராஜன்

ஹேப்பி நியூ இயர்

நள்ளிரவு கேளிக்கைகள்

மதுவிற்க்கு இலவச இணைப்பாக

சிற்றின்பத் தீண்டல்கள்

மிதக்கிறது...நம் பண்பாடு

நட்சத்திர விடுதி

நீச்சல் குளத்தில்

பிணமாக.

-ஜெ.நம்பிராஜன்

சுயரூபம்

எல்கேஜி சிறுவனின் ஏபிசிடி கிறுக்கல்கள்

வட்டத் தலையுடன் குச்சிக் கால்களுடன்

வண்ண வண்ண பொம்மைகள்

குளிக்கப் போகுமுன் எடுத்து ஒட்டிய

ஸ்டிக்கர் பொட்டுகள் சில

கணக்கு தெரியாத பால்காரியின்

கரிக்கோடுகள் ஆங்காங்கே

எண்ணெய் தேய்த்த பின் கையைத் தேய்த்த

அடையாளங்கள் சில

இவையனைத்தையும் தாண்டி எட்டிப் பார்க்கிறது

நான்கு ஆண்டுகளுக்கு முன் அடித்த

பச்சை டிஸ்டம்பரின் வண்ணம்

வெளி வார்த்தைகளால் பூட்டி வைத்தாலும்

வெளிப்பட்டு விடும் என்...

சுயரூபத்தைப் போலவே.

-ஜெ.நம்பிராஜன்

நிழலின் அருமை

ஆட்டு மயிர் வாடையுடன் வந்த

அழுக்குச் சட்டைச்சிறுவன்

மேசையைக் கழுவிய தண்ணீரில் சிறிதே

மேலேயும் தெறிக்கிறான்

தண்ணீர் தருபவன்

தன் விரல் அழுக்கையும்

சேர்த்துத் தருகிறான்

ஆர்டர் செய்து

அரை மணி கழித்து வரும்

இட்லியோ அரைவேக்காடு

அன்பளிப்பை வாங்க மறுத்த

சிப்பந்தி சொல்கிறான்,

"ஒரு ரூபாய்க்கு

ஒரு சிகரெட் கூட கிடைக்காது"

மனைவியின் அருமை

ஓட்டலில் புரியும்

-ஜெ.நம்பிராஜன்

எது வெற்றி

கடைசி ஓவர்களைத் தவறாமல் பார்த்து விட

அலுவலகத்திலிருந்து அவசரப் பயணம்

சிக்னலில் ஒருபுறம்

கைக்குழந்தையுடன் பிச்சைக்காரி

மறுபுறம்

வசூல் வேட்டையில் சாலைக்காவலர்

இடதுபுறம் போகலாமென்றால்

மூத்திர வாடை அடிக்கும் முட்டுச்சந்துகளில்

டாஸ்மாக்கர்களின் சுகமான தூக்கம்

வலதுபுறமோ

தண்ணீர்க் குடங்களின் அணிவகுப்பு

நேர்ச்சாலையில்

குழிகளில் தடுக்கி விழாமல் வீடு சேர்ந்தால்

தங்கக்கோப்பை பரிசு நிச்சயம்

தட்டுத்தடுமாறி வீடு சேர்ந்ததும்

கதவு திறந்த மனைவி சொன்னாள்

"இந்தியா வின்"

-ஜெ.நம்பிராஜன்

சென்னபட்டணம்

வாழ வரும் அனைவரையும்

வாரி அணைக்கிறது சென்னை

நல்ல சம்பளக்காரனுக்கு

அப்பார்ட்மண்டில் வீடு

குறைந்த சம்பளக்காரனுக்கு

ஒண்டுக் குடித்தன வீடு

வேலை தேடுபவனுக்குக் கூட

மேன்சனில் குடித்தனம்

சிக்னல் அருகே வசிக்கிறான்

சென்னைத் தமிழன் மட்டும்

-ஜெ.நம்பிராஜன்