காரண 'காரியம்'

"பிழைப்பு"

"காலத்தின் கட்டாயம்"

"வேறு வழியில்லை"

"நான் மட்டுமா..."

"உலக நியதி"

ஏதாவதொரு காரணம்

வைத்திருக்கவே செய்கிறார்கள்

தங்களை நியாயப்படுத்த

எல்லாத் துரோகிகளும்

-ஜெ.நம்பிராஜன்

பொங்கி வருகுது வியாபாரக் காவிரி

உலகத் தொலைக்காட்சிகளில்

முதல் முறையாக

தமிழ்த் திரையுலகினரின்

மாபெரும் போராட்டம்

நேரடி ஒளிபரப்பு

இந்நிகழ்ச்சியை வழங்குவோர்

"மைசூர் சேண்டல் சோப்"

அதே நிறுவனத்தின்

கன்னட அலைவரிசையில்...

நம்ம கன்னட மக்களுகாகி

நம்ம கன்னட நட்சத்திரகளு

மகா ஓராட்டா

இ காரிகிரமமு நிமக்கே கொடவரு

"சென்னை மூவர்ஸ் & பேக்கர்ஸ்"

-ஜெ.நம்பிராஜன்

மொழிபெயர்ப்பு:

ஓராட்டா - போராட்டம்

இ காரிகிரமமு -இந்நிகழ்ச்சி

நிமக்கே- உங்களுக்கு

கொடவரு - வழங்குபவர்

பிள்ளைத்தமிழ்

அழைக்கும் வேலைக்காரியிடம்

தாவும் குழந்தை

பார்ப்பதில்லை

சாதியும் பணமும்

தண்ணீரில் விளையாட சம்மதம்

குளிக்கச் சம்மதமில்லை

எங்கள் வீட்டு பாப்பாவுக்கு

ஒழுங்கற்றே இருந்தாலும்

அழகாய்த் தெரிகிறது

குழந்தை இருக்கும் வீடு

-ஜெ.நம்பிராஜன்

காலம்

காலத்தைத் துரத்தித் தோல்வியுறுவதே

காலத்தின் கட்டாயம் போலும்

எது எப்படி இருப்பினும்

காலம் காலம் தாழ்த்தாது

தன் கடமையைச் செய்து விடுகிறது

காலத்தைக் கைப்பற்றுவதை விட

காலத்துடன் பயணிப்பதே எளிதாயிருக்கிறது

இருப்பினும்...

இழந்த நாட்களின் வலியிலும்

நிகழும் நாட்களின் பயத்திலும்

வரும் நாட்களின் கனவிலுமே

காலம் பெரும்பாலும் கழிந்து விடுகிறது

-ஜெ.நம்பிராஜன்

தப்பு

தப்பாமல் அவ்வப்போது

தப்புகள் செய்திருக்கிறேன் நான்

சிறு வயதில் செய்த தப்புகள்

சிரிக்க வைக்கும்

இப்போது நினைத்தாலும்

அப்போது செய்த தப்புகள்

வேடிக்கையாக செய்தவை

வேண்டுமென்றே பல தப்புகள்

இப்போதும் செய்கிறேன்

தப்புத்தப்பாக தப்பு செய்து

அகப்பட்ட தருணங்களும் உண்டு

அப்போதெல்லாம்

தப்பு செய்யக் கூடாது

என்று தோன்றியதே இல்லை

தப்புத் தப்பாக

தப்பு செய்யக்கூடாது

என்று மட்டுமே தோன்றியது

-ஜெ.நம்பிராஜன்

முத்தம்

குழந்தையின் உதடுகளில்

எறும்பு கடித்தது போன்ற

பழுத்த உதடுகள் உனக்கு

இதழ் குவித்துப் பேசுகையில்

இதழ்களின் பாதைகளில்

பயணப்படும் என் மனது

இதழ்களின் இடைவெளியில்

இறுக்கப் பட்டிருந்தது

என் உயிர் மூச்சு

இன்னும் கனத்துக் கிடக்கிறது

நெஞ்சில்...

விட்டுப் பிரிகையில்

வெகு கவனமாக

எச்சில் படாமல்

நீ கொடுத்த

அந்த சம்பிரதாய முத்தம்

-ஜெ.நம்பிராஜன்

குழந்தைப்பாட்டு

முயற்சி

சிணுங்குகிறது

கை கால்களை ஆட்டுகிறது

பிறகு அழுகிறது

எதுவும் நடவாத போது

தொட்டிலில் இருந்து

தானே இறங்குகிறது

குழந்தை

கண்ணாமூச்சி

முழுவதும் மறையாமல்

கொஞ்சம் தெரியும்படி

ஒளிய வேண்டியிருக்கிறது

குழந்தைகளுடன்

கண்ணாமூச்சி விளையாடுகையில்

-ஜெ.நம்பிராஜன்